Түркияның Стамбұл қаласында Қазақстан мен Түркия арасындағы жастардың кәсіби өзара іс-қимылын дамытуға және халықаралық шығармашылық байланыстарды нығайтуға бағытталған Kazakhstan–Türkiye Youth Bridge халықаралық жастар архитектуралық жобасы өтуде.
Халықаралық жобаға Қазақстаннан 15 жас сәулетші мен білім алушы қатысуда. Олардың қатарында Әбілқас Сағынов атындағы Қарағанды техникалық университетінің «Сәулет және дизайн» кафедрасынан үш студент — Бақтыбаева Алина Сериковна, Ременников Роман Сергеевич және Қасен Әмір Даниярұлы бар.
Жоба жас сәулетшілер мен студенттердің кәсіби тәжірибе алмасуына, сәулет және қала құрылысы саласындағы заманауи үрдістермен танысуына, сондай-ақ Қазақстан мен Түркия жастары арасында жаңа кәсіби және шығармашылық байланыстар орнатуына мүмкіндік береді.
Бағдарлама аясында қатысушылар түрік сәулетінің қалыптасу тарихы мен қазіргі даму бағыттарын, қала құрылысының ерекшеліктері және заманауи сәулеттік шешімдермен танысуда. Жоба аясында сәулет саласының мамандары мен сарапшыларының дәрістері, практикалық сабақтар және кәсіби пікір алмасулар ұйымдастырылған.
Бағдарламаның маңызды бөліктерінің бірі — Стамбұл қаласының сәулеттік және тарихи-мәдени нысандарына бару. Қатысушылар қаланың тарихи келбеті мен заманауи сәулетінің ерекшеліктерін зерделеп, сәулет өнерінің әр кезеңдегі дамуымен танысуда.
Сонымен қатар жоба аясында архитектуралық воркшоп ұйымдастырылып, оның барысында қатысушылар өздерінің жобалық ұсыныстарын әзірлеп, таныстырады. Шығармашылық жұмыс барысында жастар өз идеяларын ұсынып, жобалық шешімдерін кәсіби ортада талқылап, тәжірибе алмасады.
Kazakhstan–Türkiye Youth Bridge жобасына қатысу Әбілқас Сағынов атындағы Қарағанды техникалық университеті студенттерінің кәсіби құзыреттерін кеңейтіп, практикалық тәжірибесін арттыруға және халықаралық сәулет ортасымен танысуына мүмкіндік береді. Жоба барысында алынған білім мен тәжірибе студенттердің кәсіби қалыптасуына және болашақтағы шығармашылық жобаларына маңызды негіз болады.
Халықаралық бастама Қазақстан мен Түркия арасындағы білім беру, мәдени және кәсіби ынтымақтастықты одан әрі дамытуға да ықпал етеді. Жастардың бірлескен жобаларға қатысуы екі елдің болашақ сәулетшілері арасында кәсіби байланыстар орнатып, тәжірибе және идея алмасудың жаңа мүмкіндіктерін қалыптастырады.
Әбілқас Сағынов атындағы Қарағанды техникалық университеті студенттерінің осындай халықаралық жобаларға қатысуы олардың кәсіби әлеуетін арттырумен қатар, университеттің халықаралық білім беру және шығармашылық байланыстарын кеңейтуге де өз үлесін қосуда.
