Saginov Technical University-де стартаптарға гранттық қолдау көрсететін байқаудың екінші легі сәтті аяқталды. Қорытынды кезеңде – STU DEMO DAY – стартап авторлары өз бастамаларын сарапшылар назарына ұсынды.
Бұл жолы байқауға IT, экология, әлеуметтік бастамалар мен университет инфрақұрылымын жақсартуға бағытталған 15 жоба ұсынылды. Жобалар Terricon Valley IT HUB-пен бірлескен инкубациялық бағдарлама аясында әзірленіп, қатысушылар юнит-экономика, қаржылық жоспарлау сияқты бағыттарда білім алды.
Нәтижесінде 6 жоба жалпы 28 млн теңге көлемінде грантқа ие болды. Оның ішінде ғылыми және практикалық маңызы жоғары бір жоба 10 млн теңге қаржыландыру алды.
Қаржылай көмектен бөлек, командалар университеттің менторлық қолдауы мен ресурстарына қол жеткізеді. Бұл олардың жобаларын әрі қарай дамытуына мүмкіндік береді.
STU DEMO DAY қатысушылар үшін тек қаржылай қолдау емес, кәсіби өсудің де маңызды баспалдағына айналды. Мұндай бастамалар студенттер мен оқытушыларға өз идеяларын жүзеге асыруға нақты мүмкіндік береді.
Университет алдағы уақытта да инновациялық инфрақұрылымды дамытып, акселерациялық және менторлық қолдауды күшейту арқылы стартап экожүйесін кеңейтуді жалғастырады.
