20-23 қаңтар аралығында ҚарТУ-дың шет тілдері кафедрасының аға оқытушысы Алия Токумбаева Өзбекстан Республикасындағы Үргенч мемлекеттік университетінде өткен үшкүндік Co-Design Google Sprint «Ambassadors for Inclusion – Creating an Inclusion in ELT Module» іс-шарасына қатысты.
Іс-шара AELLCA жобасы аясында, British Council қолдауымен ұйымдастырылды. Қатысу нәтижесінде Алия Токумбаева сертификат пен ағылшын тілін оқыту саласында «Ambassador for Inclusion» мәртебесін иеленіп, Қазақстан атынан қатысқан халықаралық жобадағы үш педагог-амбасадордың бірі болды.
Жоба барысында қатысушылар ағылшын тілін оқытуда инклюзия қағидаларын нығайтуға арналған мазмұн мен практикалық шешімдерді бірлесіп әзірледі. Солтүстік Ирландияның Олстер университетінің профессорлары – Барбара Скиннер және Франц Хоерицауэрмен бірге қатысушылар болашақ ағылшын тілі мұғалімдерін даярлау бағдарламасы (PRESETT) үшін «Ағылшын тілін оқытуда инклюзия» атты алты апталық модульді әзірледі. Спринт аясында педагогикалық дайындық оқу жоспарларына енгізілуі мүмкін практикалық бағытталған инклюзивтік стратегиялар мен педагогикалық шешімдер әзірленді.
