2025 жылғы 25 маусымда Әбілқас Сағынов атындағы Қарағанды техникалық университетінің әскери кафедрасында студенттердің әскери ант қабылдау салтанатты рәсімі өтті.
Осы маңызды оқиғаға орай студенттерді Әбілқас Сағынов атындағы ҚарТУ Басқарма Төрағасы – Ректоры Сәуле Сағынтаева құттықтады. Ол әскери кафедрада алған білім мен тәрбие олардың алдағы өмір жолында зор көмегін тигізетініне сенім білдіріп, таңдаған жолдарында сәттілік тіледі.
Ректордың ізгі тілектеріне кафедра басшылығы, сондай-ақ осы ұмытылмас сәттерде студенттерді қолдауға келген олардың туған-туыстары мен жақындары да қосылды.
Әскери ант қабылдағаннан кейін Қазақстан Республикасының Қарулы Күштері ҚарТУ әскери кафедрасының 400-ге жуық түлегімен толықты. Олардың үштен екісі – офицерлер, қалғандары – запастағы сержанттар. Алайда, қабылдаған антқа сәйкес, олардың әрқайсысы қажет болған жағдайда Отанын қорғауға, өз күш-жігері мен тіпті өмірін аямауға дайын.
Ант қабылдау рәсімі салтанатты шерумен аяқталды.
