Әбілқас Сағынов атындағы Қарағанды техникалық университетінің профессорлық-оқытушылық құрамы «Кәусар» оқушылар сарайы» КММ-де болып жұмысымен жан-жақты танысты. Шара университет пен оқушылар сарайы арасындағы ынтымақтастық туралы келісімшарт аясында өтті.
«Кәусар» оқушылар сарайы заманауи білім беру технологияларымен жабдықталған. Мұнда шығармашылық және көркемдік бағыттардан бастап робототехника, архитектура, телевидение ісі және өсімдік шаруашылығына дейін 40 үйірме жұмыс істейді. Балалар жеті бағыт бойынша тегін қосымша білім ала алады: көркем-эстетикалық, ғылыми-техникалық, интеллектуалдық, экологиялық-биологиялық, зерттеушілік, кәсіби бағдарлау және лингвистикалық бағыттар.
Университет делегациясы құрамында ақпараттық технологиялар, металлургия және машина жасау, энергетика, автоматика және телекоммуникация факультеттерінің өкілдері болды. Оқушылар сарайының директоры Айгерім Исбекова балалардың нақты ғылымдар мен заманауи технологияларға, соның ішінде IT, робототехника және автоматизацияға деген жоғары қызығушылығын атап өтті. Осыған байланысты жоғары технологиялық кабинеттерде жұмыс істейтін білікті педагогтарды тарту аса маңызды: робототехника, STEM-лаборатория, HI TECH цехы, заттардың интернеті және VR-архитектура.
«LEGO негізіндегі робототехника сабақтарын мектеп мұғалімдері жүргізе алса, Arduino және басқа күрделі инженерлік шешімдермен жұмыс істеу терең және арнайы білімді қажет етеді. Біз мұндай мамандарды Әбілқас Сағынов атындағы Қарағанды техникалық университетімен жасалған меморандум шеңберінде тартуды жоспарлап отырмыз», – деді Айгерім Исбекова.
Университеттің ақпараттық технологиялар факультетінің деканы Алексей Калининнің айтуынша, «Кәусар» оқушылар сарайының әлеуеті жоғары. Кездесу барысында оқытушылар мен магистранттардың тәлімгерлікке қатысуы, шеберлік сабақтарын өткізу, онлайн және офлайн форматтағы білім беру сабақтары, сондай-ақ бірлескен тренингтер мен семинарларды ұйымдастыру мүмкіндіктері талқыланды. Сонымен қатар университет студенттері мұнда тәжірибелік практикадан өте алады.
«Кәусар» оқушылар сарайы» КММ қызығушылық танытқан ҚарТУ оқытушылары мен магистранттарын осы бастамаларға қатысып, бірлесіп жұмыс жасауға шақырады.
