Әбілқас Сағынов атындағы Қарағанды техникалық университеті «Material and Mechanical Engineering Technology» ғылыми журналы машина жасау, материалтану және мехатроника саласындағы жоғары ғылыми мәртебені растай отырып, Scopus дерекқорына сәтті енгізілгенін мақтанышпен хабарлайды.
«Material and Mechanical Engineering Technology» — 2020 жылдан бері шығарылып келе жатқан рецензияланған халықаралық ғылыми журнал. Ол осы салалардағы заманауи жетістіктерді қамтитын түпнұсқа ғылыми және шолу мақалаларын жариялауға арналған платформаны ұсынады.
«Material and Mechanical Engineering Technology» жылына төрт рет ағылшын тілінде шығады және Қазақстан Республикасында, ТМД елдерінде және шетелде таратылады. Жариялау CC-BY 4.0 лицензиясының талаптарына сәйкес Интернетке қолжетімділікпен электрондық форматта жүзеге асырылады. Журнал е-library базасында және Қытайдың CNKI халықаралық деректер базасында индекстелген. Бұл материалтану, машина жасау және мехатроника саласындағы ағымдағы зерттеулерге қол жеткізуді қамтамасыз етеді.
Мақалаларды жіберу процесі авторлар үшін барынша ыңғайлы және mmet.kstu.kz ресми сайты арқылы жүзеге асырылады.
Сондай-ақ, сараптамалық комиссияның қорытындысы бойынша журнал Қазақстан Республикасы Ғылым және жоғары білім министрлігінің Ғылым мен жоғары білім берудегі сапаны қамтамасыз ету Комитеті ұсынатын басылымдар тізбесіне енгізілгенін атап өткен жөн.
Бұл маңызды оқиға Әбілқас Сағынов атындағы Қарағанды техникалық университетінің әлемдік ғылыми қоғамдастыққа белсенді қатысуға және инженерия мен технология саласындағы озық зерттеулерді ілгерілетуге деген ұмтылысын көрсетеді.
