15 қазанда Әбілқас Сағынов атындағы Қарағанды техникалық университетінің бас корпусында «Энергетикада, автоматтандыруда және телекоммуникацияда ЖИ қолданудың негізгі бағыттары» тақырыбында дөңгелек үстел өтті. Іс-шара барысында қатысушылар жасанды интеллектіні инженерлік салаларға енгізу перспективаларын, оның өнеркәсіпті цифрлық трансформациялаудағы рөлін және технологиялық процестердің тиімділігін арттыру мүмкіндіктерін талқылады.
Іс-шараға Басқарма мүшесі – цифрландыру жөніндегі проректор, информатика, есептеу техникасы және басқару саласындағы PhD докторы Азамат Жанбулатович Амиров; энергетика, автоматика және телекоммуникация факультетінің деканы, техника ғылымдарының кандидаты, қауымдастырылған профессор Феликс Назымович Булатбаев; «KPA Group» компаниялар тобының IT-шешімдер бөлімінің басшысы Олег Додонов; «Light Engineering» ЖШС бас директоры, PhD докторы Дамир Ирекович Каюмов; «АСЭП» ЖШС коммерциялық директоры Ярослав Анатольевич Щиголев; «АСЭП» ЖШС жетекші инженер-бағдарламашысы, докторант Бекжан Мерғалиұлы Аққазыев; «Қазақтелеком» АҚ байланыс желілерінің желілік құрылыстары мен абоненттік құрылғылары бойынша жетекші инженері Нұрымхан Құрышбекұлы Құрышбеков; «Өндірістік процестерді автоматтандыру» кафедрасының меңгерушісі, PhD докторы, қауымдастырылған профессор Вячеслав Викторович Югай; «Энергетикалық жүйелер» кафедрасының меңгерушісі, техника ғылымдарының кандидаты, қауымдастырылған профессор Елена Геннадьевна Нешина; «Радиоэлектроника және телекоммуникациялық технологиялар» кафедрасының меңгерушісі, PhD докторы Нұрбол Балтабаевич Қалиаскаров; «Физика» кафедрасының меңгерушісі, PhD докторы Мөлдір Серікбекқызы Дүйсенбаева қатысты.
Дөңгелек үстелге бейінді компаниялардың өкілдері, сала мамандары және шетелдік ғалым – Малайзия технологиялық университетінің электротехника факультетінің профессоры, PhD докторы Жасрул Джамани бин Джамиан да қатысты. Халықаралық ғылыми қауымдастық пен бизнес өкілдерінің қатысуы жасанды интеллектіні дамытудың өзекті үрдістерін талқылауға және ғылым мен өндіріс арасындағы ынтымақтастықтың перспективалы бағыттарын айқындауға мүмкіндік берді.
Пікірталастың маңызды бағыттарының бірі жасанды интеллект пен энергетика салалары тоғысындағы ғылыми зерттеулерді дамыту болды. Профессор Жасрул Джамани бин Джамиан халықаралық ғылыми тәжірибесімен бөлісіп, энергетика саласында жасанды интеллектіні қолдануға бағытталған бірлескен зерттеулер жүргізу мүмкіндіктерін талқылады. Мұндай бастамалар ғылыми білім алмасуға, халықаралық ынтымақтастықты нығайтуға және заманауи энергетикалық жүйелерге арналған инновациялық шешімдерді іздеуге жол ашады.
Дөңгелек үстел барысында қатысушылар жасанды интеллектіні қолданудың кең ауқымды мүмкіндіктерін қарастырды. Олардың қатарында электр энергиясын тұтыну көлемін болжау, жабдықтардың ақауларын ерте анықтау, өндірістік процестерді интеллектуалды басқару, өнім сапасын автоматтандырылған бақылау және телекоммуникациялық желілерді оңтайландыру мәселелері бар. Машиналық оқыту алгоритмдері мен үлкен деректерді талдау технологияларын қолдану ақпаратты жедел өңдеуге, ықтимал тәуекелдерді анықтауға және техникалық тұрғыдан негізделген шешімдер қабылдауға мүмкіндік береді.
Сонымен қатар жасанды интеллектіні энергия тиімділігін арттыру, инфрақұрылымның сенімділігін қамтамасыз ету және киберқауіптерді анықтау мақсатында қолдану мәселелері қозғалды. Қатысушылар интеллектуалды технологияларды енгізу үшін заманауи цифрлық инфрақұрылыммен қатар бағдарламалау, деректерді талдау, машиналық оқыту және ақпараттық қауіпсіздік салаларын меңгерген білікті инженерлік кадрлардың қажеттігін атап өтті.
Университет үшін жасанды интеллект бағытын дамыту заманауи технологияларды білім беру үдерісіне енгізуге, ғылыми-зерттеу қызметін кеңейтуге және өнеркәсіптік кәсіпорындармен әрі байланыс операторларымен әріптестікті нығайтуға қосымша мүмкіндіктер ашады. Бизнес өкілдерімен және шетелдік ғалымдармен ынтымақтастық жаңа ғылыми бастамаларды қалыптастыруға, сондай-ақ экономиканың нақты секторына арналған интеллектуалды шешімдерді әзірлеп, енгізе алатын мамандар даярлауға ықпал етеді.
Дөңгелек үстел энергетика, өнеркәсіптік автоматтандыру және телекоммуникация салаларындағы жасанды интеллектінің болашағын талқылауға арналған кәсіби диалог алаңына айналды. Кездесу қорытындысы пәнаралық тәсіл мен халықаралық ынтымақтастықтың жасанды интеллектіні дамыту, ғылыми әзірлемелерді ілгерілету және инновацияларды инженерлік тәжірибеге енгізу үшін маңызды екенін көрсетті.
