Мемлекет басшысының бірқатар білім беру ұйымдарында Бань Мо институтын ашу жөніндегі тапсырмасын орындау аясында Saginov Technical University өкілдері Қазақстан Республикасының білім беру ұйымдары делегациясының құрамында Қытай Халық Республикасына жұмыс сапарымен барды.
2026 жылғы 25–29 тамыз аралығында делегация Қытайдың бірқатар қалаларында халықаралық ынтымақтастықты дамытуға және Бань Мо институтын құру мәселелерін талқылауға бағытталған жұмыс кездесулерін өткізуде.
Saginov Technical University атынан делегация құрамына:
Инновациялық технологиялар колледжінің директоры Нұрбиби Смағұлова;
Көлік, логистика және инженерлік экономика факультетінің деканы Эльвира Қызылбаева кірді.
Сапар аясында Қазақстан делегациясы Цзинань кәсіби колледжінің басшылығымен кездесті. Кездесудің негізгі тақырыбы — Бань Мо институтын құру және Қазақстан мен Қытайдың білім беру ұйымдары арасындағы ынтымақтастықты дамыту.
Тараптар бірлескен білім беру бастамаларын жүзеге асыру перспективаларын талқылап, тәжірибе алмасты. Кездесу барысында Saginov Technical University қызметі таныстырылып, Инновациялық технологиялар колледжінің директоры Нұрбиби Смағұлова сөз сөйледі.
Сонымен қатар қазақстандық делегация Цзинань кәсіби колледжінің оқу-тәжірибелік инфрақұрылымымен танысты. Бағдарлама аясында оқу-өндірістік және инженерлік орталықтар, автомобиль және авиациялық техника кафедралары, Sinotruk жаһандық оқу орталығы, сондай-ақ колледждің басқа да білім беру және мәдени нысандары араланды.
Saginov Technical University-дің халықаралық жұмыс сапарына қатысуы Қазақстан мен Қытай арасындағы білім беру ынтымақтастығын нығайтып, жаңа бірлескен жобалар мен білім беру бастамаларын жүзеге асыруға қосымша мүмкіндіктер ашады.
