Әбілқас Сағынов атындағы Қарағанды техникалық университетінің оқытушылары, ғылыми қызметкерлері мен мамандары үшін халықаралық білім және ғылым кеңістігінде кәсіби дамуға мүмкіндік беретін бағдарламаларға құжат қабылдау басталды.
2026 жылы «Болашақ» халықаралық стипендиясы мен «Ғылыми тағылымдамалар» бағдарламасы бойынша конкурстық іріктеуге қатысуға өтінімдер қабылданады. Бағдарламалар қазақстандық мамандардың кәсіби және ғылыми әлеуетін арттыруға, жаңа зерттеу әдістерін меңгеруге, озық тәжірибелермен танысуға және шетелдік әріптестермен ынтымақтастық орнатуға бағытталған.
Ғылыми зерттеулерді халықаралық деңгейде дамыту мүмкіндігі
«Ғылыми тағылымдамалар» бағдарламасы ғылыми және ғылыми-техникалық кадрлардың біліктілігін жетекші шетелдік жоғары оқу орындарында, ғылыми орталықтарда және салалық ұйымдарда арттыруға мүмкіндік береді. Бағдарламаның мемлекеттік тапсырысшысы Қазақстан Республикасының Ғылым және жоғары білім министрлігі, ал әкімшісі «Халықаралық бағдарламалар орталығы» акционерлік қоғамы болып табылады.
2026 жылы бағдарлама аясында 165 стипендия қарастырылған. Конкурсқа ғылыми қызметкерлермен қатар педагогтер, сондай-ақ жоғары және жоғары оқу орнынан кейінгі білім беру ұйымдарының қызметкерлері қатыса алады. Бұл университеттің профессор-оқытушылар құрамы мен мамандарына өздерінің ғылыми бағыты бойынша шетелдік ұйымдарда тағылымдамадан өтіп, кәсіби құзыреттерін жетілдіруге мүмкіндік береді.
Ғылыми тағылымдаманың ұзақтығы 3 айдан 12 айға дейінгі мерзімді қамтиды. Ол ғылыми зерттеулердің басым бағыттарына сәйкес және тағылымдамадан өтуге ұсынылған жетекші шетелдік жоғары оқу орындары, ғылыми орталықтар мен зерттеу ұйымдарының базасында жүзеге асырылады.
Бағдарлама қандай шығындарды өтейді?
Ғылыми тағылымдаманы ұйымдастыру республикалық бюджет қаражаты есебінен қаржыландырылады. Қаржыландыру шеңберінде:
• тағылымдамадан өту ақысы;
• виза рәсімдеу және консулдық алым;
• тұру және тамақтану шығындары;
• ғылыми әдебиеттер сатып алу;
• медициналық тексеру және медициналық сақтандыру;
• Қазақстандағы тұрғылықты жерінен тағылымдама орнына дейінгі және кері бағыттағы жол жүру шығындары;
• қабылдаушы шетелдік ұйымның міндетті қызметтері өтеледі.
Бағдарлама жеңімпазы тағылымдаманы аяқтағаннан кейін жұмыс берушінің өтінімі бойынша өзі жіберілген ұйымда кемінде үш жыл үздіксіз еңбек қызметін жалғастыруы қажет. Сонымен қатар міндеттемелердің орындалуын қамтамасыз ету үшін белгіленген талаптарға сәйкес екі кепілгер ұсынылады.
Құжаттар 2026 жылғы 16 наурыздан 30 қазанға дейін қабылданады.
Конкурстық іріктеу 2026 жылғы 13 сәуірден 31 желтоқсанға дейін өткізіледі.
Үміткерлер өтінімді электрондық үкімет порталы арқылы бере алады. Бағдарлама талаптары, қажетті құжаттар, ғылыми зерттеулердің басым бағыттары және ұсынылатын шетелдік ұйымдар туралы толық ақпарат «Халықаралық бағдарламалар орталығы» АҚ-ның ресми сайтында орналастырылған. Ресми сайтта үміткерлерге арналған жеке бөлім, нормативтік құжаттар және өтінім беру сервистеріне сілтемелер берілген.
Әбілқас Сағынов атындағы Қарағанды техникалық университеті оқытушыларды, ғалымдарды және қызметкерлерді осы мүмкіндікті тиімді пайдалануға шақырады. Халықаралық ғылыми тағылымдама жаңа зерттеу әдістерін игеруге, кәсіби байланыстарды кеңейтуге, бірлескен жобаларды дамытуға және алынған тәжірибені университеттің білім беру мен ғылыми қызметіне енгізуге жол ашады.
Толық ақпарат:
https://bolashak.gov.kz/kz/o-nauchnyh-stazhirovkah-po-ns
