Университет базасында оқушыларға арналған «Summer Science School» жазғы мектебі ұйымдастырылды. Бұл — оқушыларға заманауи ғылым, инженерия және цифрлық технологиялар бағыттарымен танысуға, болашақ мамандығын саналы таңдауға мүмкіндік берген бірегей білім беру алаңы.
Жазғы мектеп аясында қатысушылар университеттің білім беру бағыттарымен танысып, «Металлургия және жаңа материалдар», «Автоматтандыру өндірістік процестері», «Химия және химиялық технологиялар», «Ақпараттық-есептеу жүйелері» кафедраларына барып, зертханалардың жұмысымен және заманауи инфрақұрылыммен танысты.
Университет оқытушылары оқушыларға сабақтар өткізіп, ғылыми-зерттеу жұмыстары, заманауи технологиялар, инженерлік бағыттар және болашақ мамандықтар туралы ақпарат берді. Қатысушылар бағдарламалау, робототехника, инженерлік графика, химия, нанотехнологиялар, геодезия және кәсіпкерлік бағыттары бойынша практикалық білім алды.
Жобаның негізгі мақсаты — оқушылардың ғылыми-техникалық шығармашылығын, инженерлік ойлауын және зерттеушілік дағдыларын дамыту, ғылым мен технологияға қызығушылығын арттыру.
Іс-шараға Академик Е.А. Бөкетов атындағы ЖББМ және Назарбаев Зияткерлік мектебінің оқушылары қатысты.
«Summer Science School» оқушыларға ғылымды тек теория жүзінде емес, заманауи зертханалар мен тәжірибелік сабақтар арқылы танып-білуге мүмкіндік берген маңызды жоба болды.
[/su_custom_gallery][/su_custom_gallery]