Оқу орнында шетелдік және отандық компаниялардың өкілдерін шақыра отырып қонақ дәрістер өткізу тұрақты тәжірибеге айналған. Университеттің «Өнеркәсіптік көлік» кафедрасының үшінші және төртінші курс студенттері «ҚТЖ»ҰК» АҚ филиалының магистралдық желі бөлімшесінің Жаңа Қарағанды станциясының бастығы Қайрат Адамбековпен кездесті.
Еңбек жолын жол жөндеуші ретінде бастаған Қайрат Конрадұлы өмірін теміржол саласына арнаған. Түрлі бөлімшелерде қызмет етіп, станция бастығы лауазымына дейін көтерілді. «Инженерлік кадрларды жаңа үлгіде даярлау» тақырыбындағы дәрісінде ол станция кезекшілерінің жұмысына кеңінен тоқталды. Кезекшілер – смена жетекшілері, пойыз қозғалысының қауіпсіздігін қамтамасыз етеді, бағыттағыштар мен сигналдарды басқарады, машинистер мен диспетчерлермен өзара әрекеттеседі, сондай-ақ басқа да маңызды міндеттерді атқарады.
Кездесуде студенттер ақпараттың пойыз диспетчерлеріне, машинистерге, көрші станцияларға және техникалық қызметтерге қалай берілетінін, құжаттарды қалай рәсімдеу керегін, сондай-ақ теміржол мамандарына қажетті кәсіби қасиеттерді білді. Сондай-ақ бейнеролик арқылы көлік тораптарының өзара әрекеттесуін және мамандардың үйлесімді жұмысын тамашалады.
