STU-де бакалавриат, магистратура және докторантура түлектері, сондай-ақ өңірлік және республикалық кәсіпорын өкілдері қатысқан дәстүрлі «Карьера Start» бос орындар жәрмеңкесі өтті. Шамамен 70 компания өздерінің өзекті бос жұмыс орындарын ұсынып, студенттермен кездесулер өткізді.
Жәрмеңкенің ресми ашылуында Абылқас Сағынов атындағы Қарағанды техникалық университетінің әлеуметтік-тәрбие жұмысы жөніндегі проректоры Абай Қалыков, Қарағанды облысы бойынша Еңбек ұтқырлығы орталығы басшысының орынбасары Даурен Кошкаралиев және кәсіпорын өкілдері құттықтау сөз сөйледі. Олар еңбек нарығындағы жаңа мүмкіндіктерді және инженерлік мамандықтарға деген жоғары сұранысты атап өтті.
«STU Орталық Қазақстандағы техникалық білім берудің көшбасшысы болып қала береді, сұранысқа ие мамандарды даярлайды және білім беру бағдарламаларын жұмыс берушілердің талаптарына сәйкес жаңартып отырады. Жыл сайын өтетін “Карьера Start” бос орындар жәрмеңкесі – жоғары курс студенттері мен түлектер үшін жұмысқа орналасудың тамаша мүмкіндігі. Ынтымақтастық үшін жұмыс берушілерге алғыс білдіреміз және студенттерге кәсіби жолының сәтті басталуын тілейміз», – деді әлеуметтік-тәрбие жұмысы жөніндегі проректор Абай Қалыков.
Іс-шараға Тау-кен факультетінің, Сәулет-құрылыс факультетінің, металлургия және машина жасау, инновациялық технологиялар, энергетика, автоматика және телекоммуникациялар, көлік, логистика және инженерлік экономика факультеттерінің шамамен 1500 білім алушысы қатысты.
Бос орындар жәрмеңкесі студенттер мен жұмыс берушілер арасындағы тікелей байланысты нығайтуға ықпал етті. Іс-шара университет пен еңбек нарығы арасындағы өзара іс-қимылды күшейтіп, жас мамандарға кәсіби мансабын сенімді түрде бастауға мүмкіндік берді.
